Azərbaycanda təhsil haqda müzakirələrin məişət səviyyəsindən, elmi səviyyəyə qaldırılmasına ehtiyac var.
Bunu elm və təhsil naziri Emin Əmrullayev Təhsildə Yeni Çağırışlar V Beynəlxalq Forumunda çıxışı zamanı deyib.
O qeyd edib ki, təhsili məişət səviyyəsində saxlasaq, irəli gedə bilməyəcəyik.
Təhsil məsələləri üzrə ekspert Rizvan Fikrətoğlu Crossmedia.az-a açıqlamasında Azərbaycanda təhsilə baxış məsələsini şərh edib:
Azərbaycanda təhsil daha çox məişət səviyyəsində müzakirə edilir, ciddi arqumentlər azdır. Təhsilə yanaşma dəyişməlidir. Azərbaycan insanının düşüncəsində təhsil orta məktəbi bitirib repetitor yanında hazırlaşmaq, sonra universitetə qəbul olmaq, daha sonra pis ya yaxşı buranı da bitirib kiminsə sayəsində iş tapmaqdan ibarətdir. Bu, düzgün yanaşma deyil, kökündən yanlışdır.
Bu məsələlərdə maksimum prioritetlər ortaya qoyulmalıdır. Yuxarı siniflərdə imtahanlardan keçmək xatirinə test səviyyəsində əzbərçilik, yaxud diplom almaq xatirinə universitet oxumaq, universitetinin yaşlı müəlliminin “sovetdən qalma” rus mühazirələrin tərcümə variantını köçürməsi düzgün sistem, elm deyil. Bu istiqamətlərdə baxış bucağının dəyişilməsi mütləqdir.
Təhsilin müzakirəsində qlobal düşünmək, sırf daxili problemlərlə məsələni yekunlaşdırmaq düzgün deyil. Birinci olaraq “təhsil nədir?” sualını nəzəri yox, praktiki izah etmək lazımdır. Şərt o deyil ki, təhsil aldım və mənim yaxşı işim olacaq. Bu, sadəcə məqsədlərdən biri ola bilər. Təhsillə sağlam cəmiyyət yetişdirə, əbədiyyət qazanmaq olar. Biz isə daha az öyrənməklə çox qazanmağın hiylələrini axtarmaq yolun tutmuşuq.
