Rusiyanın Xarici Kəşfiyyat Xidmətinin rəhbəri Sergey Narışkin, ABŞ və Böyük Britaniyanın “Şimal Axınları” qaz kəmərlərinin partladılması ilə bağlı diversiyada birbaşa iştirak etdiklərinə dair təkzibedilməz sübutların olduğunu açıqlayıb.
Crossmedia.az pravda.ru-ya istinadən xəbər verir ki, Narışkin, Müstəqil Dövlətlər Birliyinə (MDB) daxil olan ölkələrin xüsusi xidmət orqanları rəhbərlərinin 55-ci iclasında bu barədə məlumat verib. Onun sözlərinə görə, bu partlayışlar anglosaks kəşfiyyat xidmətləri tərəfindən planlaşdırılıb, hazırlanıb və həyata keçirilib.
Narışkin həmçinin Qərbdə aparılan istintaqa etibarın olmadığını bildirib və bu hadisədə əsl günahkarların məsuliyyətə cəlb olunacağına şübhə ilə yanaşıb. O qeyd edib ki, Rusiya bu məsələ ilə bağlı dəfələrlə Avropa ölkələrindən məlumat tələb edib, lakin heç bir cavab almayıb.
Xarici kəşfiyyat xidmətinin rəhbəri Ukraynalı dalğıc həvəskarlarının iştirakına dair versiyanı “sadəlövh” adlandıraraq onu tənqid edib. Narışkinin fikrincə, ABŞ hökuməti, Avropanı, xüsusilə də Almaniyanı, Rusiya enerji resurslarından birdəfəlik uzaqlaşdırmaq üçün bu radikal addımı atmağa qərar verib.
Narışkinin vurğuladığı kimi, “Şimal Axınları”nın məhv edilməsi Avropa üçün, ilk növbədə Almaniya üçün Rusiya enerji tədarükünü kəsməyə yönəlmiş məqsədli bir hərəkət idi.
