Hər birimiz həyatımızda bir dəfə də olsa, "xalxın uşağı" ifadəsini eşitmişik. Valideynlər başqasının övladının müsbət xüsusiyyətlərini iş, təhsil və digər sahələrdəki uğurlarını öz övladlarına deyir, onlar ilə müqayisə edir və irad tuturlar. Bu müqayisə onların gələcək həyatına təsir edir.
"Xalxın uşağı" ilə müqayisənin təsiri ilə bağlı psixoloq Ezgi Şahin Crossmedia.az-a açıqlama verib. Psixoloq bu müqayisənin uşaqların özgüvənini zədələdiyini bildirib:
"Valideynlərin əksəriyyəti bu müqayisədə qarşı tərəfi əzir və övladının özgüvənini zədələyirlər. Bəzi uşaqlarda özgüvən əskikliyinin olmasının əsas səbəbi belə müqayisələrdir. Valideynlər uşaqları kiçik yaşlardan bacarıqlı olan digər yaşıdları ilə qarşılaşdırırlar. Onlar bilmirlər ki , hər uşağın özünəməxsus qabiliyyəti var. Bir uşaq idmanda yaxşı ola bilər, digəri isə rəsmdə. Valideynlər çox vaxt bunu qəbul etmirlər. İstəyirlər ki, övladları ancaq riyaziyyatdan yaxşı olsun: riyaziyyatı bilmirsə, heç bir fənni bilməsin".
Psixoloq vurğulayır ki, bu nüanslar uşaqları gərginləşdirir:
"Onlar həmişə yaşıdlarından üstün olmağı istəyirlər. Bu zaman uşaqda yetərsizlik düşüncəsi yaranır. Bu düşüncə yetkinlik dövrünə kimi davam edir. Onlar daim qarşı tərəfin razılığını istəyirlər: "Mən yaxşıyam, hə?", "Mən səncə bunu bacarıram?" tipli suallar verirlər. Qarşı tərəfdə görür ki ,bu insan özgüvənsizdir. Kiçik yaşlarından başqaları ilə müqayisə olunan bu tip insanlar işkolik olurlar,daim danışmaq istəyirlər. Məqsədləri isə insanlardan özləri haqqında təriflər almaq olur".
Zeynəb Mustafazadə
